HARO oo deeq lacageed qaybisay

Ururka Samafalka ee Humanitarian African Relief organization marka magaciisa lasoo gaabiyana loo yaqaano HARO oo kamida ururada soomaaliyeed ee mutadawiciinta ah ee kajira cariga maraykanka ayaa deeq lacageed soo gaadhsiiyay dad danyar ah oo kunool magaalada buuhoodle.

Deeqdan lacagta ah oo uu ururka HARO usoo mariyay dadkan danyarta ah Sh, C/rashiid Xaaji Samatar oo kamida culimada deegaanka buuhoodle ayaa waxaa maanta lagaadhsiiyay dadkii loogu talo galay, dadkan oo isuugu jiray rag iyo dumarba ayaa waxay ubadnaayeen dad waayeel ah, kuwaasi oo badankoodu duruufo dhaqaale la ildarnaa.

 Dadkan danyarta ah ee maanta lasoo gaadhsiiyay deeqdan lacagta ah oo aan waraystay ayaa dhamaantoodba waxay aad ugu mahadnaqeen Ururka HARO, iyagoo aad ugu duceeyay masuliyiinta ururkan ilaahayna uga baryay inuu wax ka khayr badan ugu buuxiyo meeshii ay kazoo saareen lacagtaasi.

 Deeqdan lacageed ee uu ururka HARO uu soo gaadhsiiyay dadkan danyarta ah ayaa waxay kusoo beegmaysaa xili mudooyinkii ugu danbeeyay ay xiisado colaadeed ka taagnaayeen Deegaanka Buuhoodle, xiisadahaasi oo ay ku bara kaceen dad farabadan oo danyar ah.

 Iskusoo wada duuboo deeqdan lacageed ee uu ururka HARO soo gaadhsiiyay dadkan danyarta ah ayaa waxay noqonaysaa tii ugu horaysay ee nooceeda ah ee lasoo gaadhsiiyo dadka danyarta ah ee kunool deegaanka buuhoodle tan iyo intii ay kazoo cusboonaadeen xiisadaha colaadeed deegaankan, iyadoo aanay dadkaasi wax gargaar bini aadanimo ah dhanaba ka helin.